ازاى تسافر البرازيل؟

١- التأشيرة: تأشيرة السياحة للبرازيل مش صعبة.. بتملي ال online applicationn و تطبعه، كشف حساب بنكي، تأمين صحي، حجز الفندق، حجز طيران و HR Letter. سفارة البرازيل في ابراج الnile towers و مش محتاج ميعاد مسبق.. مصاريف التاشيرة كانت ب 800 جنيه قبل تحرير سعر الصرف.

٢- الطيران: اكبر مشكلة بسبب ثمن التذكرة و طول الرحلة.. حاول تحجز تذكرتك بدري بتفرق في السعر كتير.. دور علي Skyscanner و بعدين اسأل في شركة سياحة ( غالباً شركة السياحة بيجيبولك أسعار اقل)..غالباً الاختيارات بتبقي طيران الاتحاد- Turkish airlines- Alitalia- Ethiopian airlines.. مفيش وجود لمصر للطيران.

٣- الإقامة: هتكلم عن ريو دي چانيرو بس البرازيل بلد بها نسبة عالية من الفساد و نتج عن ده نسبة عالية من الفقر و الجهل و الجريمة و ده يخليك تفكر ايه المكان الآمن اللي تقدر تختاره في ريو.. ريو تنقسم لعدد من الأحياء.. المناطق السياحية اللي علي شاطئ المحيط الاطلنطي هي اللي فيها تشديد أمني من الشرطة و بالتالي ممكن تفكر تقعد هناك و هي Copacabana و دي أشهر شاطئ هناك مليانة فنادق و hostels و شقق- Ipanema و Leblon و دي مناطق أرقي و أغلي في السعر. لو هتحجز فندق يبقي اسهل حجز من علي booking و لازم تشوف ال rating و تقرا ال reviews كويس علشان تعرف عيوب الفندق و مميزاته.. الأسعار هناك متفاوته و فيه فنادق كتير رخيصة و نضيفة جداً. لو هتحجز شقق يبقي airbnbb هتلاقي أسعار رخيصة.

٤- المصاريف: 1 Brazilian Real = 4.85 EGP للأسف و بعد تحرير الصرف سعر الريال بقي الضعف عن قبل كدة (2.700 جنيه).. للأسف هتحتاج فلوس كتير معاك و خصوصاً ان ممكن كروت البنك متشتغلش معاك هناك (من غير سبب واضح- مثال: كارت debit البنك الاهلي اشتغل معايا مشتريات و سحب نقدي.. كارت credit البنك الاهلي اشتغل سحب نقدي بس و مرضيش يشتغل مشتريات) توقع ان الكارت المصري ممكن يبيعك في اي وقت.

المواصلات العامة هناك نضيفة بس زحمة الي حد ما ( الأتوبيس و المترو).. التاكسي غالي و بتلاقي تفاوت في العداد من تاكسي لغيره.. Uberr هناك ممتاز و اوفر في الوقت و رخيص جداً لان عندهم ممكن تختار تركب مع مشوار تاني في نفس العربية فتدفع مبلغ ثابت و اقل"uber pool" او تختار عربية ليك لوحدك زي عندنا في مصر " uber x" و ده هيبقي أغلي

٥- الفسح: أسعار متفاوتة جداً.. ممكن تعمل رحلة ب 70 أو ب 3000 ريال لنفس المكان علي حسب هتروح لوحدك او مع شركة سياحة.. ادخل علي visit.rio هتلاقي كل حاجة ممكن تعملها في ريو بالاسعار.

الفصال مهم جداً في كل مكان حتي في الصرافة D:

٦- الانترنت: معظم الأماكن فيها wifii بس هتحتاج تشتري خط برازيلي و للأسف دي نقطة مش لطيفة لأنهم عاملين باقات الانترنت المحترمة للبرازيليين فقط لازم تشترك فيها بإدخال رقم البطاقة البرازيلي.الاجانب بيشتركوا في باقات يومية او أسبوعية بتخلص بسرعة جدا.. الحل انك تنزل علي موبايلك: Offline map of rio de Janiero on google maps Offline Portuguese language on google translate علشان تقدر تستخدمهم من غير إنترنت و انت في الشارع.

ملحوظة علشان متتفاجئش: معظم البرازيليين مش بيتكلموا غير برتغالي

اقرأ البوست الأصلى هنا واتفرج ع الصور

#البرازيل #Brazil #Lati #امريكااللاتينية