تنزانيا و جزيرة زانزيبار

محمد السيد
Dec 4, 2016
5 min read

تقرير السفر الي تنزانيا و جزيرة زانزيبار

تنزانيا موقعها الجغرافي في شرق وسط قارة افريقيا تطل علي المحيط الهندي في الشرق و اوغندا كينيا في الشمال و رواندي و بروندي و الكونغو في الغرب و في الجنوب زامبيا و ملاوي و موزمبيق يوجد بها اعلي قمة جبلية في افريقيا و هو جبل كالمينجارو ارتفاعه اد جبل سانت كاترين 3 مرات!

العاصمه الفعليه : دودوما لكن اهم مدينه هي العاصمه السابقة و تعتبر العاصمه الاقتصادية و الاداريه هي دار السلام العمله : الشلن التنزاني 1 دولار امريكي = 2180 شلن تعداد السكان: 49 مليون نسمه حسب احصائيات 2013 اللغه الرسمية: السواحيلي الديانات: الاسلام و المسحية و اليهودية لكن الغالبية العظمي مسلمين و مسيحيين

بالنسبه للسفر: التأشيره بتكون عند الوصول في المطار في تنزانيا لمدة 3 شهور تكلفتها 50 دولار!

- اول اما بتوصل المطار في دار السلام، تنزانيا بتملي استماره ببياناتك و تروح خزنه تدفع 50 دولار و تسلمهم جواز سفرك و الاستماره و هتلاقي ظابط واقف بينادي الاسماء للجوازات اللي اتختمت تروح تستلم جوازك و التأشيره منه!

الاوراق المطلوبة لتعبئة بيانات استماره التأشيره في المطار في تنزانيا :-

- حجز فندق من علي موقع www.hostelworld.com بتدفع 12% ل 20% من المبلغ و الباقي عند الوصول للفندق! مفيش هنا هوستلات تماما كلها غرف مفرده في فنادق سعرها من 20 دولار في الليله لحد 600 دولار اللي انا كنت قاعد فيه في دار السلام اسمه stay inn ب 30 دولار في الليله مكانه ممتاز في الشارع الرئيسي و جنبك كل المطاعم و الماركتات و شركات المحمول! عيب stay inn الوحيد ان النت فيه سئ جدا! و في فندق تاني ادامه اسمه ABC Travelers بس مش عارف سعره! ملحوظه الفنادق هنا بتكون شامله وجبة الافطار! اعمل حجز الفندق في دار السلام حجزين منفصلين كل حجز مدته يوم واحد و هما يوم الوصول و يوم المغادرة للقاهرة لانك مش هتحتاج تقعد في دار السلام اكتر من كدا لانها فاضية و كل الانشطه هتعملها بره!

- شهادة تطعيمات دولية للملاريا من وزارة الصحة و مختومة بختم النسر من وزارة الصحة نفسها مش من اي مركز بره و الا مش هيكون معترف بيها! ساعات بيسألوا علي الشهاده و عليها غرامه 50 دولار! بس روح اطعم عشان نفسك و صحتك الوقاية خير من العلاج! و اطعم حمي صفراء و شوكية بالمره هيعملوا اجمالي 300 ج تقريبا!

- حجز طيران ذهاب و عودة انا سافرت علي مصر للطيران افضل لانها بتبقي رحله مباشرة سعرها 3700 ج من مطار القاهرة!! في ايام التيكت ساعات سعرها بيوصل ل 15 الف! انت دور علي ارخص ايام ذهاب و ارخص عوده هتلاقيهم عاملين السعر دا 3700 ج!

- الاكل سعره زي مصر مفيش فرق! تكلفة الاقل لمدة 11 يوم هو 770 جنيه بمعدل 70 جنيه في اليوم تقرببا من المطاعم

ملحوظة مهمه جدا : يستحسن تسافر معاك ورقات 100 دولار لان اي ورقه اقل من 50 دولار بيحسبوا سعرها 1400 شلن يعني هتخسر تلت قيمة الفلوس اللي معاك ابعد تماما عن ورقات ال 1 و 5 و 10 دولار خليك كل اللي معاك 50 و 100 دولار بس!

اول اما تخرج من المطار هتلاقي اكشاك لشركات المحول اقوي شبكة هناك هي Vodacom اللي هي فودافون عندنل سعر الخط 2500 شلن و هتحتاج رصيد ب 20 الف شلن يعني 10 دولار هتستخدم منهم 15 الف شلن في عمل باقة انترنت 3 جيجا تستخدمها في Google maps عشان متوهش و تعرف تستخدم uber .. الفيس بوك و يوتويوب و whatsapp هنا استخدامهم مجاني مش بيتخصم من الباقه!

- اول اما تخرج من المطار هتلاقي تاكسيات تبع المطار دول غاليين عندهم تعريفه موحده 35 دولار خد تاكسي من بره في الشارع و هتكون اجرته 10 دولار

افضل اماكن ممكن تروحها و اللي بتميز تنزانيا تسلق جبل كالمنجارو - غابات سرنجيتي - غابات جورنجور و جورنجورو كريتا و جزيرة زانزيبار دول هبقي اتكلم عنهم بالتفاصيل في الجزء التاني مخصوص لوحدهم لانهم موضوع كبير جدا

- مفيش مشكله في التواصل كلهم بيتكلموا انجليزي

- متاجرش عرببات هناك لان شرطة المرور كتير جدا و هتدفع مخالفات رادار كتير اوي! غير كدا الشرطة في حالها تماما بعيد عن السياح! اما تشتري شريحة الموبايل ابقي استخدم Uber !! اوبر موجوده هنا و سعرها سدس سعر التاكسي هتوفرلك كتير جدا!

- متخليش اي حد يساعدك تماما و لا يشيل عنك شنطة ولا يدلك علي طريق لان الناس كلها عايزه تاخد منك تبس هنا و البقشيش عندهم بيكون ب ال 5 دولار! فتحذير مؤكد ولا تخلي حد يحولك عمله ولا يشيل عنك شنطة ولا يدلك لاي طريق ولا يعملك اي خدمه مهما كانت صغيره! انت مش مشلول ولا فلوسك كتير! الخدمات هنا في الشارع كلها بمقابل و غالية جدا! و يستحسن تكون مجهز فلوس منفصله عن اللي معاك قبل اما تدفع اي شئ لانه لو شاف معاك دولارات او فلوس كتير بعملتهم هيطمعوا فيك!! و هاتكلم عن موضوع انك تهرب من دفع البقشيش و الامان و ازازي ميتاخدش منك فلوس كتير هناك في تقرير لوحده و موضوع مهم جدا

جزيرة زانزيبار!!! ازاي اروح جزيرة زانزيبار!! زانزيبار هي جزيرة تقع في المحيط الهندي امام ساحل تنزانيا كانت دوله لوحده و مقاطعه تابعه لسلطنة عمان لكن حصل فيها ثورة قتل فيها 20 الف مدني و استقلت عن الحكم العماني و انضمت لتنزانيا!

في طريقتين اول طريقة عن طريق الجو تبع شركة اسمها Coastal Airline مدة الرحله 20 دقيقه و سعر التذكره 50 دولار للاتجاه الواحد!

او عن طريق عباره من الميناء سعرها 35 دولار للفرد في الاتجاه الواحد مدة الرحله ساعتين!

تحذير مهم اوعي تخلي حد يشيلك الشنط في الميناء او يحجزلك التذكره او يقولك تعمل ايه او يدلك علي طريق هياخد عموله 50 دولار و متعبرش اي حد ينادي عليك!! تجاهل كل الناس لانك لو رديت هتدفع 50 دولار ! احجز انت بنفسك من الشباك في الميناء و خلي معاك 70 دولار منفصلين تماما سعر التيكت ذهاب و عوده! اوعي تحول دولارات من الميناء سعر الدولار هناك سعره النص يعني لو معاك 100 دولار هيحولوها بعملتهم كانها 50 دولار حول من بره!

سعر الفندق في جزيرة زانزيبار اللي انا كنت قاعد فيه غرفه دايركت علي الشط !! و شط رملي ابيض ممتاز صاحبته ايطاليه و ناس كويسين فدي ميزه انك هتبعد عن التبس! تكلفة الليله 41 دولار + 9 دولار ضرايب يعني 50 دولار في الليله الاقامه شامله وجبة الافطار اسمه Ebony and Ivory beach hotel مكانه في مدينة Nungwi في شمال الجزيره! Nungwi بتبعد عن الميناء مسافة 82 كم مدة الوصول للمدينه ساعه و 20 دقيقه اجرة التاكسي 20 دولار

انا شايف ان 3 ايام مناسبين جدا لزانزيبار! متزودش عن 3 ايام الا لو انت في شهر عسل او معاك اصحابك!

ملحوظة الشواطئ البيضاء مش موجوده غير في مدينة Nungwi في الساحل الشرقي و شمال الجزيرة

الانشطه اللي ممكن تتعمل ممكن تصطاد في البحر سعر الرحله 15 دولار ل 3 ساعات او تروح غابات جيرزاني سعرها 20 دولار او تعمل سنوركلنج ب 15 دولار او تعمل جوله في stone town تروح بيت العجايب مقر السلطان العثماني القديم ب 15 دولار! انت ممكن تفاصل و تقلل الاسعار عن كدا!

في تنزانيا لازم تكون ناصح لازم تفاصل تفاصل و تفاصل لو قالك 50 دولار قوله هما 5 بس اللي معايا و صمم و اثبت علي رايك! كان في سلسله عجباني بتتباع ب 25 دولار فاصلت و جبتها ب 2 دولار!

المصاريف الاساسيه هي طيران 3700 ج تأشيره 500 ج اكل و شرب 770 ج فندق من 300 ل 400 ج في اليوم معدا رحلات السفاري بيكون التخييم و الاقامه فيها من ضمن الفلوس المدفوعه في الرحله