كل حاجة عن التصريح الأمنى

س. يعنى إيه تصريح أمنى ؟

ج. التصريح الأمنى هو موافقة من الجهات الأمنية المختصة على سفرك إلى بعض الدول

س. إيه الدول اللى بتحتاج تصريح أمنى؟

ج. القايمة مش ثابتة بس فيها حوالى 16 دولة بتحتاج تصريح هى : تركيا – ماليزيا – أندونيسيا – تايلاند – كوريا الجنوبية – جنوب أفريقيا – إسرائيل – قطر – السودان – ليبيا – لبنان – غينيا كونكرى – الأردن – العراق – سوريا – اليمن

س. إيه هى الفئات اللى بتحتاج تصريح أمنى؟

ج. جميع المسافرين بين 18 و 40 سنة بيحتاجوا تصريح أمنى

س. هل تركيا لها تصريح أمنى لو فى وظيفة على الباسبور؟

ج. تركيا لها تصريح أمنى فى كل الأحوال سواء طالب أو حاصل على أو موظف لكن الطالب و الحاصل على هيحتاج دعوة و تأشيرة زيارة للحصول على التصريح الأمنى

س. التصريح الأمنى بيطلع إزاى و منين ؟

ج. مجمع التحرير هو الجهة الوحيدة فى مصر المسئولة عن إصدار التصريح الأمنى

الأوراق المطلوبة لإستخراج التصريح أصل الباسبور و صورة منه + تأشيرة الدولة اللى هتسافر لها و بتملا نموذج هناك و بتستلمه بعد 4 أيام

س. ممكن حد ينوب عنى فى إستخراج التصريح الأمنى؟

ج. حضور صاحب الطلب شخصيا شرط أساسى لإستخراج التصريح

س. ماهى مدة سريان التصريح ؟

ج. التصريح الأمنى سارى لمدة شهرين من تاريخ الإصدار

س. أنا عايز أسافر تركيا هل ممكن أطلع التصريح بسهولة ؟

ج. فى حالة لو مكتوب فى باسبورك إنك طالب أو حاصل على بكالوريوس هتحتاج تأشيرة زيارة عشان تقدر تطلع التصريح و لو مكتوب مهنة فى الباسبور بتطلع تأشيرة سياحة من السفارة و بتروح تقدم على التصريح فى مجمع التحرير.

س. إيه هى إجراءات إستخراج التصريح الأمنى للسفر لماليزيا؟

ج. لو مكتوب فى الباسبور طالب هتحتاج فيزا زيارة عشان تقدر تطلع التصريح.

لو مكتوب حاصل على أو مهنة فى الباسبور مش هتحتاج لتصريح أمنى.

س. أنا بنت و عايزة أسافر تركيا إيه إجراءات التصريح الأمنى للبنات و السيدات؟

ج. فى حالة إنك مثبت عندك وظيفة فى الباسبور هتطلعى تأشيرة سياحة و تقدمى على التصريح بدون مشاكل.

فى حالة إنك طالبة أو حاصلة على هتحتاجى تأشيرة زيارة أو إنك تطلعى تأشيرة مرافقة للأب أو الأخ أو الزوج أو العم و بعدين بتروحى تقدمى على التصريح و بيتكتب عليه إنك مرافقة و يتم إلغاء السفر فى حالة عدم سفر المرافق.

س. أنا مسافر و هنزل ترانزيت فى تركيا هل بأحتاج تصريح أمنى؟

الترانزيت مش بيحتاج تصريح أمنى

بس فى ناس بتقول إن الترانزيت لو تعدى عدد ساعات معين بتحتاج لتصريح لكن المعلومة غير مؤكدة.

س. أنا مسافر تركيا بس من دولة تانية هل باحتاج تصريح أمنى؟

ج. لأ التصريح الأمنى للمسافرين من مصر بس

س. أنا مسافر تركيا من دولة تانية بس سمعت إن فى مشاكل ممكن تحصل لى لو شافوا التأشيرة و أختام الدخول و الخروج على الباسبور هل الكلام ده حقيقى؟

ج. كلام مش مظبوط و مافيش أى مشاكل هتقابلك لما ترجع مصر

س. لو سافرت تركيا عن طريق جورجيا هل باحتاج تصريح أمنى ؟

ج. ده بيتوقف على الظابط فى المطار لو شاف فيزا تركيا على الباسبور ممكن يلغى سفرك و ممكن تعدى بفيزا جورجيا من غير ما يشوف الفيزا يعنى الموضوع فيه مخاطرة.